جامعہ کراچی کی ڈائری|علی احمد جان |PASSUTIMESاُردُو

ku2جامعہ کراچی کی ڈائری|علی احمد جان

|PASSUTIMESاُردُو

جامعہ کراچی کا شمار ملک کی عظیم درسگاہوں میں ہوتا ہے۔ ایک برطانوی رپورٹ کے مطابق جامعہ کراچی دنیا کی صف اول کی 700 جامعات میں سے ایک ہے۔ ایشیاء کی 300 بڑی اور معیاری جامعات کی درجہ بندی میں جامعہء کراچی 246 ویں نمبر پر ہے۔ اس عظیم تعلیمی ادارے کی بنیاد قیام پاکستان کے چار سال بعد جون 1951 میں رکھی گئی۔ ابتدا میں صرف چار شعبوں میں درس و تدریس کا آغاز کیا گیا اور آج یہ ملک کی سب سے بڑی جامعات میں سے ایک ہے۔

۔1279 ایکڑ زمین پر محیط موجودہ کیمپس کا قیام 1959 میں عمل میں آیا تھا۔ جامعہ کراچی میں اس وقت مندرجہ ذیل چھے فیکلیٹیز تدریس کی سہولیات فراہم کر رہی ہیں:
فیکلٹی آف سائنس
فیکلٹی آف سوشل سائنسز(جو پہلے فیکلٹی آف آرٹ کہلاتی ہے)
فیکلٹی آف مینجمنٹ اینڈ ایڈمنسٹریشن سائنس
فیکلٹی آف انجینئرنگ
فیکلٹی آف فارمیسی
اس کے علاوہ قانون کی تدریس کا بھی اجراء کیا جاچکا ہے۔

ان چھے فیکلٹیز میں کل 52 شعبہ جات ہیں جن میں 31,000 سے زائد طلبہ تعلیم حاصل کرتے ہیں۔ اس کے علاوہ ہزاروں طلبہ جو ملازمت یا کسی اور وجہ سے باقاعدہ داخلہ نہیں لے سکتے وہ پرائیویٹ امتحانات دے کر ڈگری حاصل کرسکتے ہیں۔ جامعہ کراچی ہر سال ایسے ہزاروں پرائیویٹ طلبہ کو ڈگریاں عطا کرتی ہے۔ جامعہ کراچی کے ساتھ الحاق شدہ کالجوں کی تعداد 145 ہے۔ ان میں سالانہ ڈیڑھ لاکھ کے قریب طلبہ تعلیم حاصل کرتے ہیں۔ ان طلبہ کے لیے امتحانی پرچے ترتیب دینا، نتیجہ تیار کرنا اور ڈگریاں فراہم کرنا جامعہ کے شعبہ امتحانات کی ذمہ داری ہے۔
جامعہ کراچی میں سیکیورٹی صورتحال
جامعہ کراچی میں آمدورفت کے لیے پانچ داخلی دروازے ہیں۔ ان داخلی دروازوں پر سیکیورٹی اور دیگر امور کی انجام دہی کے لیے سیکورٹی عملہ موجود ہے جس کی تعداد 120 ہے جن میں 10 خواتین بھی شامل ہیں2۔ سیکیورٹی اہلکاروں کی یہ تعداد جامعہ کی ضروریات کو سامنے رکھتے ہوئے ناکافی اور غیر تربیت یافتہ ہے۔
جامعہ کراچی میں طلبہ تنظیموں کے کارکنان میں لڑائی جھگڑوں پر قابو پانے اور امن امان کی صورت حال بہتر بنانے کے لیے پہلی بار 1989 میں500 رینجرز اہلکاروں کو غیر معینہ مدت کے لیے تعینات کیا گیاتھاجو 26 سال گزرنے کے باوجود امن و امان کی فضا کو بحال کرنے میں ناکام رہے ہیں۔ رینجرز کی تعیناتی کے باوجود طلبہ تنظیموں میں تصادم اور خونی واقعات کو روکا نہیں جا سکا۔
جامعہ کراچی میں طلبہ تنظیموں کے کارکنان میں لڑائی جھگڑوں پر قابو پانے اور امن امان کی صورت حال بہتر بنانے کے لیے پہلی بار 1989 میں500 رینجرز اہلکاروں کو غیر معینہ مدت کے لیے تعینات کیا گیاتھاجو 26 سال گزرنے کے باوجود امن و امان کی فضا کو بحال کرنے میں ناکام رہے ہیں۔
27 اکتوبر 2008 کو دو طلبہ تنظیموں میں ہونے والے تصادم میں تین طالب علم اپنی جان سے ہاتھ دھو بیٹھے تھے۔ ان تنظیموں (اے پی ایم ایس او اور اسلامی جمیعت طلبہ) کے درمیان ہونے والے تصادم کے دوران لوہے کی سلاخوں، پتھروں اور ڈنڈوں کے علاوہ اسلحہ بھی استعمال کیا گیا۔ مندرجہ بالا سانحہ اس بات کی دلیل ہے کہ کوئی بھی فرد آسانی سے اسلحہ لے کر جامعہ کی حدود میں داخل ہوسکتا ہے۔ اس سے قبل 2007 میں اسی نوعیت کے واقعے میں 12 طالب علم زخمی ہوگئے تھے۔
28 دسمبر 2010 میں اسی نوعیت کے ایک اور واقعے کے دوران ایک مذہبی طلبہ تنظیم (آئی ایس او) کے اسٹینڈ کے پاس عین اس وقتدھماکہ ہوا جب اس مسلک کے طالب علم باجماعت نماز ادا کر رہے تھے۔ اس دھماکے میں پانچ طالب علم شدید زخمی ہوگئے تھے۔ بم ڈسپوزل اسکواڈ کے مطابق اس دھماکے میں 200 گرام دھماکہ خیز مواد استعمال کیا گیا تھا۔
سال 2011 میں دو طلبہ تنظیموں میں تصادم کے نتیجے میں 11 طالب علم زخمی ہوگئے تھے۔ دونوں گروہوں کی جانب سے لوہے کے راڈ، پتھر اور ڈنڈوں کا آزادانہ استعمال کیا گیا اور فائرنگ بھی کی گئی۔ تصادم کی وجہ مختلف شعبوں میں کی جانے والی وال چاکنگ تھی۔
ان واقعات کے باوجود جامعہ میں مذہبی و سیاسی طلبہ تنظیموں کو دیگر تعلیمی اداروں کی نسبت خاصی آزادی حاصل ہے۔ یہاں طلبہ تنظیمیں اپنے لیے ’’اسٹینڈ‘‘ بناتی ہیں جن کے گرد سیمنٹ سے بنی بینچ لگاکر ’’قبضہ‘‘ کی ہوئی جگہ کو جھنڈوں سے سجایا جاتا ہے۔ یہ اسٹینڈ تنظیمی سرگرمیوں کا مرکز ہوتا ہے۔ کسی بھی تنظیمی اسٹینڈ کے آس پاس کسی دوسری تنظیم کا فرد پوسٹر نہیں لگا سکتا۔ ہر تنظیم ماہانہ بنیادوں پر کوئی نہ کوئی تقریب منعقد کرتی ہے۔ جس کے لیے باقاعدہ پوسٹر اور بینر لگائے جاتے ہیں۔ یہ پوسٹرز یونیورسٹی کے ہر شعبے کی دیواروں پر لگائے جاتے ہیں۔ وائس چانسلر کا دفتر، کینٹین اور غسل خانے بھی ان پوسٹرز سے محفوظ نہیں۔ یہ نہ صرف عمارتی حسن کو گہنہا دیتے ہیں بلکہ اکثر تصادم کا باعث بھی بنتے ہیں۔ واضح رہے کہ جامعہ میں آٹھ مذہبی و سیاسی طلبہ تنظیموں کے ’’اسٹینڈ‘‘ موجود ہیں۔
اخباری اطلاعات کے مطابق طلبہ تنظیموں کے علاوہ جامعہ کراچی میں دو کالعدم تنظیمیں (سپاہ محمد اور سپاہ صحابہ) بھی سرگرم عمل ہیں جو نہ صرف ایک دوسرے کے خلاف دیواروں پر چاکنگ کرتی ہیں بلکہ جامعہ کے حدود میں اسٹڈی سرکلز کا انعقاد بھی کرتی ہیں۔
اخباری اطلاعات کے مطابق طلبہ تنظیموں کے علاوہ جامعہ کراچی میں دو کالعدم تنظیمیں (سپاہ محمد اور سپاہ صحابہ) بھی سرگرم عمل ہیں جو نہ صرف ایک دوسرے کے خلاف دیواروں پر چاکنگ کرتی ہیں بلکہ جامعہ کے حدود میں اسٹڈی سرکلز کا انعقاد بھی کرتی ہیں۔ خبر میں یہ بتایا گیا ہے کہ جامعہ کی ایک معلمہ ان سرگرمیوں میں بڑھ چڑھ کر حصہ لیتی ہیں۔ دوسری کالعدم تنظیم کی حمایت میں شعبہ انگریزی اور کمیسٹری کے دو اساتذہ کھلم کھلا بات کرتے ہیں۔ خبر کے مطابق ان میں سے ایک استاد دوران تدریس کھلم کھلا تنظیم سے وابستگی کا اظہار کرتا ہے۔ ان کے خلاف اب تک کوئی کارروائی نہیں کی گئی۔ دونوں تنظیموں کے کارکنان کے مابین یونیورسٹی کی مرکزی مسجد پر غلبہ پانے کے معاملے پر تصادم بھی ہو چکا ہے۔
جامعہ کی حدود میں موجود ہاسٹل میں مقیم طالبات کے ساتھ نقدی اور قیمتی اشیاء چھیننے کے دو مختلف واقعات حال ہی میں رپورٹ کیے گئے ہیں۔ فروری کے مہینے میں رات آٹھ بجے شعبہ حیوانیات کی طالبہ سے موبائل فون چھیننے کی کوشش کی گئی جبکہ دوسرے واقعے میں ایک نامعلوم مسلح شخص شعبہ انگریزی کی طالبہ سے موبائل فون چھین کر فرار ہوگیا۔
ان واقعات اور تنظیموں کی سرگرمیوں کے بارے میں جامعہ کے استاد، ماہر سماجیات و جرمیات ڈاکٹر فتح محمد برفت جو 1970کی دہائی میں جامعہ کراچی کے طالب علم بھی تھے کا کہنا ہے کہ ’’کیمپس کے اندر لڑائی جھگڑے کا کوئی واقعہ خال خال ہی رونما ہوتا تھا۔ خصوصاً یونین کے انتخابات کے دوران لڑائی ہوتی تھی مگر کسی طالب علم کے جسم پر خراش تک نہیں آتی تھی۔ یہ نظریاتی لڑائی تھی۔ انتخابات کے بعد دائیں بازو اور بائیں بازو کی دونوں تنظیموں (این ایس ایف اور جمیعت) کے کارکنان ساتھ بیٹھ کر چائے پیتے تھے۔” واضح رہے کہ 9 فروری 1984کو فوجی آمر ضیاالحق نے ملک بھر میں طلبہ یونین پر پابندی عائد کردی تھی۔ بعد ازاں ترقی پسند طلبہ تنظیموں کو جڑ سے اکھاڑنے کے لیے مذہبی طلبہ تنظیموں کے کارندوں کو جامعہ کے اندر سرگرم ہونے کا موقع دیا گیا۔ صوبہ سندھ میں طلبہ یونین کو 1979 میں ہی غیر قانونی قرار دے دیا گیا تھا۔
رینجرز کی کارکردگی موثر کیوں نہیں؟
ان واقعات کے پیش نظر یہ بات پوچھی جاسکتی ہے کہ جامعہ میں رینجرز کی کارکردگی کتنی موثر رہی ہے اور وہ امن و امان کی صورت حال بہتر بنانے میں کس حد تک کامیاب ہوئے ہیں۔ اول تو سیکیورٹی اہلکاروں اور رینجرز کی موجودگی میں کوئی بھی ناخوشگوار واقعہ پیش نہیں آنا چاہیئے اور اگر پیش آتا بھی ہے تو رینجرز کو فوراً جائے وقوعہ پر پہنچ کر صورت حال کو قابو میں لانا چاہیئے۔ تنظیموں کے مابین ہونے والے تصادم میں رینجرز پہنچنے میں اتنی دیر لگاتی ہے کہ تب تک حالات قابو سے باہر ہو چکے ہوتے ہیں۔ اکثر یہ بھی دیکھنے میں آیا ہے کہ سیکیورٹی اہلکار گھنٹوں بعد جائے ورادات پر پہنچتے ہیں، وہاں آس پاس موجود کسی بھی طالب علم کو پکڑ کر لے جاتے ہیں اور تشدد کا نشانہ بناتے ہیں۔ مختلف واقعات کے دوران جامعہ کی حدود میں فائرنگ کرنے والے افراد میں سے کبھی کوئی گرفتار نہیں ہوا۔ رینجرز اور سیکیورٹی کا عملہ ڈیوٹی پر ہونے کے باوجود مسلح طلبہ کا یونیورسٹی میں داخل ہونا ایک تشویش ناک امر ہے۔
جب یہ سوالات جامعہ کراچی کے سیکیورٹی سپروائزر آصف کے سامنے رکھے گئے تو ان کا یہ کہنا تھا کہ رینجرز صرف سیکیورٹی عملے کی ’معاونت‘ کے لیے موجود ہے۔ سیکیورٹی عملے کے پاس تربیت اور جدید آلات نہ ہونے کی وجہ سے انہیں اپنی ذمہ داریاں سرانجام دینے میں دشواری کا سامنا ہے۔
رینجرز کے برتاؤ سے اکثر طلبہ ناخوش نظر آتیہیں۔ وہ طلبہ جن کی کسی سیاسی و مذہبی طلبہ تنظیم سے وابستگی نہیں ہے، ان کا کہنا ہے کہ رینجرز کا رویہ تنظیموں سے وابستہ لڑکوں کے ساتھ اچھا ہوتا ہے جبکہ عام طالب علم کے ساتھ مختلف ہوتا ہے۔ نام ظاہر نہ کرنے کی شرط پر ایک طالب علم نے بتایا کہ داخلی دروازوں پر ڈیوٹی پر مامور رینجرز اور سیکیورٹی اہلکار عام طلبا کی موٹر سائیکل رکوا کر وہیں پارک کراتے ہیں جس کی وجہ سے انہیں تقریباً ادھا گھنٹہ پیدل چل کر اپنے شعبے تک پہنچنا پڑتا ہے جبکہ طلبہ تنظیموں سے منسلک افراد کی سواریاں روک ٹوک کے بغیر یونیورسٹی حدود میں داخل ہو جاتی ہیں۔ جب یہ سوال سیکیورٹی سپروائزر سے پوچھا گیا تو ان کا کہنا تھا کہ تنظیموں کے اراکین رینجرز کے ساتھ تعلقات بڑھاتے ہیں اور سلام دعا رکھتے ہیں۔ اس وجہ سے دوسرے طلبا کو یہ لگتا ہے کہ ان کے ساتھ امتیازی سلوک کیا جاتا ہے۔ یہ ایک حقیقت ہے کہ جامعہ میں امن و امان کی صورت حال خراب کرنے میں بعض طلبہ تنظیموں کے اراکین کا اہم کردار ہے۔ جامعہ کے مرکزی دروازے اور تدریسی شعبہ جات کے درمیان 15 سے 20 کلو میٹر کا فاصلہ ہے جو اکثر طلبا پیدل طے کرتے ہیں۔ کچھ سال پہلے تک جامعہ کے اندر شٹل سروس موجود تھی جو طلبہ کو داخلی دروازوں سے متعلقہ شعبوں تک پہنچاتی تھی۔
جامعہ کراچی؛ چند سماجی مسائل
جامعہ کی حدود میں سگریٹ، چھالیہ اور گٹکے کا کاروبار بھی عروج پر ہے۔ تقریباً ہر کینٹین پر سگریٹ اور چھالیہ دستیاب ہوتی ہے۔ اس کے علاوہ یونیورسٹی میں زیر تعلیم طالبات کو بھی سیکیورٹی کے سلسلے میں کئی مسائل کا سامنا کرنا پڑتا ہے۔ یاد رہے کہ یونیورسٹی میں پڑھنے والے طلبہ میں سے 60 فیصد سے زائد تعداد طالبات کی ہے۔ جامعہ کراچی میں طالبات کو جنسی طور پر ہراساں کرنے کی خبریں بھی اخباروں کی زینت بن چکی ہیں۔ اگرچہ ایسے واقعات کی تعداد اخباری اطلاعات سے کہیں زیادہ ہے لیکن بہت سی طالبات ایسے واقعات رپورٹ ہی نہیں کرتیں۔
گزشتہ برس 15 جنوری کی ایک خبر کے مطابق شعبہ سماجی بہبود (سوشل ورک) کے ایک استاد کے خلاف کچھ طالبات نے جنسی ہراسانی کی شکایت درج کرائی تھی۔ اس سے قبل شعبہ اردو کے ایک پروفیسر کے خلاف بھی جنسی ہراسانی کی شکایت سامنے آئی تھی۔ اعترافِ جرم کے بعد سینڈیکیٹ کی میٹنگ میں پروفیسر صاحب کو عارضی طور پر معطل کیاگیا تھا جنہیں بعد ازاں بحال کر دیاگیا۔

ان دنوں جامعہ میں ’’وین مافیا‘‘ سرگرم عمل ہے جو طلبہ کو پک اینڈ ڈراپ کی ’’سہولت‘‘ فراہم کرتا ہے۔ ہر وین سے یونیورسٹی انتظامیہ ماہانہ 6,000 روپے وصول کرتی ہے۔ سیکیورٹی سپروائزر آصف کے مطابق یہ پیسے جامعہ کے اکاونٹ میں ڈالے جاتے ہیں۔ یہ پیسے کہاں اور کس مقصد کے لیے استعمال ہوتے ہیں اس سے انہوں نے لاعلمی کا اظہار کیا۔ چندسال پہلے تک جامعہ کی درجنوں بسیں طلبہ کو آمدورفت کی سہولیات مہیا کرتی تھیں جو یکایک غائب ہوگئی ہیں اور ان کی جگہ پرائیویٹ وین سروس والوں نے لی ہے۔ جامعہ کے کئی ملازمین کی پانچوں انگلیاں گھی میں ہیں۔ ان میں مالی اور چپڑاسی بھی شامل ہیں۔ ایک تیر دو شکار کے مصداق یہ اپنی تنخواہیں بھی وصول کرتے ہیں اورساتھ ساتھ ڈیوٹی کے اوقات میں جامعہ کے اندر رکشہ بھی چلاتے ہیں۔ ان رکشوں کا کام چند سال پہلے تک شٹل سروس سے لیا جاتا تھا جو اب نظر نہیں آتی۔ رکشے والے ڈیپارٹمنٹ سے گیٹ تک 50 سے 100 روپے کرایہ لیتے ہیں۔ ان رکشوں سے متعلق سیکیورٹی خدشات پر سیکیورٹی انتظامیہ کا جواب سمجھ سے بالاتر ہے۔ سیکیورٹی حکام کے مطابق ‘چند غریب لوگوں کی روزی کا انتظام ہورہا ہے تو اس پر کوئی اعتراض نہیں ہونا چاہیئے۔’
داخلی دروازوں پر ڈیوٹی پر مامور رینجرز اور سیکیورٹی اہلکار عام طلبا کی موٹر سائیکل رکوا کر وہیں پارک کراتے ہیں جس کی وجہ سے انہیں تقریباً ادھا گھنٹہ پیدل چل کر اپنے شعبے تک پہنچنا پڑتا ہے جبکہ طلبہ تنظیموں سے منسلک افراد کی سواریاں روک ٹوک کے بغیر یونیورسٹی حدود میں داخل ہو جاتی ہیں۔
گزشتہ دنوں جامعہ کے حدود میں ایک اور افسوسناک واقعہ اس وقت پیش آیا جب پوائنٹس ٹرمنل کے قریب کچھ لڑکے اور لڑکیاں کرکٹ کھیل رہے تھے۔ اطلاعات کے مطابق مذہبی طلبہ تنظیم اسلامی جمیعت طلبہ کے اراکین نے آکر لڑکوں کومارنا شروع کردیا جب لڑکیوں نے بچانے کی کوشش کی تو وہ بھی زد میں آگئیں۔ اس کے بعد جمعیت اور آل پاکستان مہاجر سٹوڈنٹ آرگنائزیشن کے درمیان تصادم کے دوران تین طلبا زخمی ہوگئے۔ اس واقعے کے بعد بھی سیاستدانوں کی جانب سے رسمی مذمت کی اطلاعات آئیں اور گورنر سندھ عشرت العباد نے شیخ الجامعہ کو واقعے کی انکوائری کے لیے کمیٹی تشکیل دینے کا حکم دیا ہے۔
یہ بات سمجھ سے بالاتر ہے کہ رینجرزاور سیکیورٹی اہلکاروں کی بھاری نفری کی موجودگی میں جامعہ کے اندر ایسے واقعات کیسے ہوتے ہیں اور ذمہ داران کے خلاف بروقت کارروائی کیوں نہیں کی جاتی؟کچھ واقعات سے یہ تاثر ملتا ہے کہ جامعہ کا عملہ بالواسطہ یا بلاواسطہ ان واقعات میں ملوث ہوتا ہے۔ اس کی واضح مثال رواں برس فروری میں وزیر اعظم یوتھ پروگرام کے تحت جامعہ کراچی کے قابل اور اچھے نمبر حاصل کرنے والے طلبہ کو ملنے والے لیپ ٹاپس میں سے درجنوں غائب ہونا ہے۔ گزشتہ برس اسی نوعیت کے ایک اور واقعے میں دو ہزار تیار شدہ ڈگریاں نامعلوم افراد رات کے اندھیرے میں چراکر فرار ہوگئے مگر ان کا سراغ نہیں مل سکا۔ جہاں تک امن و امان کی صورت حال کا تعلق ہے اس کی خرابی کی گواہی تسلسل کے ساتھ آنے والے ناخوشگوار واقعات دیتے ہیں۔ بدقسمتی سے جامعہ کراچی میں پیش آنے والے ناخوشگوار واقعات کی روک تھام کے لیے کوئی بھی ذمہ داری لینے کو تیار نہیں

بقول جون ایلیا
کون اس گھر کی دیکھ بھال کرے
روز ایک چیز ٹوٹ جاتی ہے

جامعہ کراچی اور گلگت بلتستان کے طلبا
گلگت بلتستان سے تعلق رکھنے والے طلبا بڑی تعداد میں جامعہ کراچی کے مختلف شعبوں میں زیر تعلیم ہیں۔ ان طلبا کو تین کیٹیگریز میں تقسیم کیا جاسکتا ہے۔
۱۔ وہ طلبا جو اپنا سارا وقت اور پیسہ پڑھائی اور حصول تعلیم کے لیے خرچ کرتے ہیں۔
2۔ وہ طلبا جو ملازمت کے ساتھ ساتھ تعلیم بھی حاصل کرتے ہیں۔ یہ طلبا جزوقتی طور پر ریستورانوں اور دیگر کمپنیوں میں کام بھی کرتے ہیں۔
3 ۔ طلبا کی ایک بڑی تعداد ایسی بھی ہے جو اپنا تمام تر وقت اور محنت جامعہ میں موجود سیاسی و مذہبی طلبا تنظیموں کے لیے وقف کرتے ہیں۔
اس با ت کو گلگت بلتستان کے طلباکاشعور کہیں یا لاشعوری کہ تمام تنظیموں میں خطہء بے آئین کے طلبا سرگرم عمل نظر آتے ہیں۔ کچھ طلبا تنظیمیں ایسی بھی ہیں کہ اگر گلگت بلتستان سے تعلق رکھنے والے طلبا کارکنوں کو نکال دیا جائے تو شاید ان تنظیموں کی وجودیت ہی ختم ہوجائے۔ امامیہ اسٹوڈنٹس ایسوسی ایشن (ISO) اور پیپلز اسٹوڈنٹس فیڈریشن (PSF) اس کی واضع مثالیں ہیں۔ آئی ایس او کے نوے فیصد کارکنان اور عہددران کا تعلق گلگت بلتستان سے ہے۔ یہ بھی ایک تلخ حقیقت ہے کہ پی ایس ایف (شعیہ) اور پی ایس ایف (سنی) کے دو دھڑے بنانے میں بھی گلگت بلتستان کے طلبا کا اہم کردار ہے۔ جیسا کہ گلگت بلتستان شعیہ العقیدہ طلباکا جھکاؤ آئی ایس او کی طرف ہوتا ہے اور سنی العقیدہ طلبا کی ہمدردیاں اسلامی جمیعت طلبا کے ساتھ ہوتی ہیں۔ سن 2000 کے آوائل میں جب بھی طلبا تنظیموں میں تصادم ہوتا تھاتوزخمی ہونے والوں میں سب سے زیادہ گلگت بلتستان کے طلبا شامل ہوتے تھے کیونکہ بدقسمتی سے ان تمام تنظیموں میں لڑائی جھگڑوں کے معاملے میں گلگت بلتستان کے طلبا ہمیشہ سب سے آگے ہوتے ہیں۔ اسی سال کے اواخر میں طلبا تنظیموں میں ہونے والے ایک تصادم میں گلگت کا ایک طالب علم اپنی جان سے ہاتھ دھو بیٹھا تھا۔ جامعہ کراچی کے شعبہ اردو کی ایک پروفیسر گلگت بلتستان کے طلبا کو ناپسندیدہ قرار دیتی ہیں۔جب راقم نے ان سے وجہ پوچھی تو ان کے الفاظ کچھ یوں تھے۔
’’اتنی دور سے پڑھنے کے لیے یہاں آتے ہیں مگر جامعہ میں سالہا سال پوسٹر اور جھنڈے لگاتے نظر آتے ہیں۔ اس میں کوئی شک نہیں بہت ساتھ قابل اور محنتی طلبابھی موجود ہیں مگر جامعہ کی نظم و ضبط کی خلاف ورزی کرنے میں گلگت بلتستان کے طلبا سب سے آگے ہوتے ہیں۔ یہ طلبااپنا سارا وقت تنظیموں کے اسٹینڈز پر بیٹھ کر ضائع کرتے ہیں۔آئی یس او، جمیعت، اے پی ایم ایس او، بی این ایس او سمیت دیگر تنظیموں میں گلگت بلتستان کے طلبا سب سے آگے ہوتے ہیں۔‘‘
ایک اور پروفیسر نے نام ظاہر نہ کرنے کی شرط پر بتایا کہ جامعہ کے اندر کئی غیر قانونی کاموں میں طلباتنظیمیں کسی نہ کسی طور پر ملوث ہو تی ہیں ان میں گلگت بلتستان کے طلبا پیش پیش ہوتے ہیں۔ گزشتہ چند سالوں میں گلگت بلتستان سے تعلق رکھنے والے درجنوں طلبا کو جامعہ کراچی میں بی اے، بی کام اور ایم اے کے پرائیویٹ امتحان میں اصل امیدوار کی جگہ پرچہ دینے ہوئے پکڑے گئے۔
ایک مچھلی کے سارا تالاب گندہ کرنے کے مصداق چند لوگوں نے پورے خطے کو بدنام کردیا ہے۔ اس کا ہر گز مطلب یہ ہے کہ گلگت بلتستان کے تمام طلبا اس صف میں کھڑے ہیں۔جامعہ کے کئی شعبہ جات میں نمایاں نمبروں سے کامیابی حاصل کرتے ہیں اور خطے کا نام روشن کرتے ہیں۔


پھسو ٹائمز اُردُو کی اشاعت مورخہ 06 جنوری، 2016ء

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s